Sora el pian de la laguna …

Canzonette veneziane di Antonio Buzzolla

Matteo Zenatti, tenore – Chiara Zocca, pianoforte

La massima falsa

Come penso ai tanti spasemi
che provava un anno fa,
vogio dir co de Anzoleta
gera belo e cusinà
sì proprio proprio cusinà,
me se inchiava i denti in boca,
me vien come el pelo d’oca,
ma po digo e me consolo:
a la fin ghe ne son fora,
una sola ne inamora,
el pericolo ò passà.

Se se dasse de trovarme
co una tosa a ciacolar
posso adesso cimentarme,
posso ridere e scherzar.
S’anca vado in sentimento,
amoreti del momento,
xe impossibile scaldarme,
no ghe penso gnanca sora,
una sola ne inamora,
el pericolo ò passà.

Confidando in ste mie massime
da la sera a la matina
de Marieta me desmentego,
son fanatico per Nina,
ma con ti Teresa mia
son per perder la partia
e purtropo meto in dubio
se una sola ne inamora,
el pericolo ghè ancora,
son da novo inamorà
ah sì per ti Teresa mia
son da novo inamorà.

L’amor platonico

L’amor platonico se loda asae,
ma Nina credime le xe vechiae
che al nostro secolo no le par bon.

Sto amor platonico no l’è che un truco
sognà per trapola da qualche cuco
che de filosofo vol darse ton.

L’amor de ciacole presto se stufa,
el xe un intingolo che g’à la mufa,
el xè un garofolo ma senza odor.

Ma Nina credime sto amor xe un sogno
del metafisico ne g’à bisogno
quando g’à el fisico perso el vigor.

Lassa a le vechie zogar sto scaco
quando dei solidi le à svodà el saco
e col romantico le vol star su…

purtropo! credime, dai gusti suti
vien quel de oribile che ne fa tuti
veri platonici senza virtù.

L’amor fragioto*

Cate mia fra tanti amori
gh’è un amor a la barona
che fa presto e no minciona,

vogio dir l’amor fragioto
che vien fora come un goto,
tich tach, in t’un supion sì.

Credi a mi sto andar al longo
l’è un amor mezzo postizzo
el xe quasi come un stizzo
che per far che nol se stua
supia supia e pò se frua
tutto el fià senza rason.

Co sto brodo tanto longo
sastu Cate a quanti e quanti
per tirar avanti avanti
sastu cossa che ghe toca?
De morir col pan in boca
e lassarghe suso el cuor.

Donca megio fa i to conti
che l’amor che cava el goto
proprio xe sì proprio xe l’amor fragioto
l’è una quagia cota in speo
che magnada a scotadeo
la g’à el dopio de saor,
sì la g’à el dopio de saor.

*fragioto: godereccio, crapulone

El proponimento

Amalia perdonime, vien qua femo pase,
g’ò torto, son perfido, ma più non farò,
do di xe che spasemo col cuor sule brase,
che pianti! che lagreme! mi solo lo so.

Se ancor più in colera tu resti ben mio
d’afano assecurite Tonin morirà sì,
ti xe tropo barbara se za son pentio,
se ancuo me rimprovero d’averte mancà,
g’ò torto, son perfido, ma più non farò.

Zanze**

T’ò visto sul pergolo un zorno de festa,
e sin da quel’epoca go perso la testa.
No go più memoria, ne so quel che fassa
E togo distrato el pan per fugassa.
Son tetro, son burbero, son fora de mi;
no vedo che Zanze, no penso che a ti.

No magno, no bevo, no vado a pasegio;
zigando el to nome, la note me svegio;
me stufo se lezo, se stago sentà;
se canto, el respiro mancando me va.
No vedo che Zanze, no penso che a ti;
no posso durarla a viver cussì.

Ah! Pieghite o cara; no star cussì dura;
no farme quel pegio, perché go paura;
se un’anema tenera te bulega in sen
non esser tirana co’ chi te vol ben.
A un povero toso che langue per ti,
sì, ghe vol tanto poco a dirghe de sì!

**Zanze: Angela

L’abandon

Un zorno, a ricordarmelo
me sento vegnir fredo,
dito ti m’à: no credo,
un falso ti xe ti.
E con dispeto oribile
senza passar parola
a rider ti xe sola,
oh povereto mi!
Gnanca fra Marco e Todero
s’à mai tratà cussì.***
Se no ti credi, o viscere,
che mi te vogia ben,
cavime el cuor dal sen
varda se t’amo ti;
ma non lassarme in lagreme
tuta la vita mia
credime mi saria
morto per ti ogni dì.
Gnanca fra Marco e Todero
s’à mai tratà cussì.
No creder a le ciacole
de Nane maldicente,
s’anca nol pol dir gnente
el dise mal de mi.
Torme el vorìa quel anzolo
che gò trovà qua in tera,
farme el vorìa la guera
sempre de note e dì.
Gnanca fra Marco e Todero
s’à mai tratà cussì.
Vien qua montemo in gondola
nu altri dò soleti,
amor no ga dileti
co son lontan da ti.
Ma cossa mai… in colera
ti te mantien ancora?
Proprio ti vol che mora?
Oh povereto mi!
Gnanca fra Marco e Todero
s’à mai tratà cussì.

***Gnanca tra Marco e Todero …: Tra Palazzo Ducale e la Biblioteca Marciana ci sono due colonne, una di S. Marco e l’altra di S. Teodoro. Tra queste due colonne venivano eseguite le sentenze.

La gelosia

Non te sentar Catina su sto bel prà de fiori,
scampa lontan da lori,
badighe al to fedel… Ah!
Su sto bel prà de fiori non te sentar Catina,
badighe al to fedel, badighe al to fedel.

Ognun ga suso un’ava,****
che dandoghe un baseto
ghe sorbe el sugo neto
e lo trasforma in miel.
Non te sentar, non te sentar, badighe al to fedel.
Guai se custie se acorze
qua e là zirando a caso
che merita un so baso
il primo fior del dì,
ti arischiaressi in bota
che sui to lavri, o cara,
le rancurasse a gara
el miel che xe per mi.
Non te sentar, Catina, badighe al tò fedel

****ava: ape

La riflession

Chi se agiuta a minchionarse***** el piacer lo gusta più
L’artifizio d’inganarse xe a le volte una virtù.
No xe in fato mai l’aurora come in versi la lezé;
mai cussì la salta fora l’è un inganno, ma godé.

Se quel baso a Nina bela no avé dà proprio col cuor,
xe arzento de copela le carezze del so amor.
La se ingana e pur la gode; vu godé, ve minchioné;
monéa falsa paga e scode l’uno e l’altro, ma godé;

Co’ gh’è un giozzo de riflesso, schiao paroni, sior piacer;
trové el vero troppo spesso che xe poco lusinghier.
Minchionarse, minchionarse, cari amici, se se pol;
za se ariva a sminchionarse e xe alora che ne dol.

*****minchionarse: prendersi in giro

El fresco

Spira, spira, e in tanta calma
l’acqua infresca, o venteselo,
che la gondola e el batelo
le armonie fa in ziro andar.

Caldo el zorno, se se afana;
solo a note se respira,
venteselo spira, spira,
viene tuti a rinfrescar.

Svelte tute sbalza in barca
de Venezia le più bele.
Ele in acqua, e in ciel le stele
vol far pompa de splendor.

Fresca arieta de marina,
sora el pian de la laguna,
spira che, zo da la luna,
su ogni barca svola amor.

El pentimento

Sì, xe verissimo, ti g’à rason,
sì, son un perfido, son un baron,
ma in ti carina tanto bonina
com’è possibile sta crudeltà!
Ah! Nina amabile, pietà… pietà!

Co Zanze gerimo dopo disnar
soto una pergola a pasegiar,
un pochetin scaldà dal vin,
Nina credendola Zanze ho basà.
Ah! Nina amabile, pietà… pietà!

Credi un equivoco l’è sta, un error,
mi senza acorzerme son traditor,
ma son pentio del falo mio,
me xe un rimprovero sta infedeltà.
Ah! Nina amabile, pietà… pietà!

El risultato

Ti lo vedi Cate mia se son degno de pietà,
tiro i oci e paro proprio da le strighe supegà.******
M’astu tolto per quel’Ercole che g’aveva tanto fià,
i zenoci me fa giacomo, son ridoto un bacalà.
Te ricordistu Catina quando a ti me son tacà?
Aborisso, ti m’à dito, quel che xe bestialità.
Mi son tuta sentimento, vogio un cuor per mi formà,
lo voi puro come un specio dall’amor divinisà,
mi voi prove e no voi ciacole, ma le voi de fedeltà,
gnanca un baso a tradimento nessun omo m’à scrocà.
Sarò toa te lo prometo, ma te vogio ben provà.
Ah! Cate mia t’intendo adesso de che prove ti à parlà,
Cate Cate Cate mia de che prove ti à parlà,
i zenoci me fa giacomo*******, son ridoto un bacalà,
Cate mia t’intendo adeso de che prove ti à parlà.

******supegà: succhiato

*******i zenoci me fa giacomo: mi tremano le gambe

La virtù magica

Done care, done bele cossa mai voleu de più?
Ah! Gavè tra carne e pele qualche magica virtù!
Gh’è nissun che ghe resista? No lo credo in verità
No, chi pol mai far una lista dei prodigi che la fa?
Al brilar de do pupile, al soriso d’un bochin
Branca in pressa el fuso Achille torna Alcide in bocassin.
Per vu el mato fa giudizio, deventè la so rason,
fe a l’incontro per caprizio d’un filosofo un bufon.
Sempre averta a becar cuori vu la trapola tegné
Un se ingambara? Schiao siori! Fe de lu quel che volé!
Done care ….